Homenaxe aos cooperantes galegos falecidos nos últimos anos

Alberto Núñez Feijóo presidiu esta mañá un acto de homenaxe aos catro cooperantes galegos falecidos nos últimos 11 anos mentres realizaban o seu traballo en pro dos que menos teñen.

O presidente da Xunta de Galicia dedicou unhas palabras aos catro cooperantes homenaxeados: Manuel Cota Cabanillas, Henrique Aller López, Mercedes Arteche Prieto e José Ignacio Salgado Blanco, e ás súas familias, presentes no acto, agradecendo o seu traballo e a entrega do seu ben máis prezado: a vida, á construción dun mundo máis equitativo e desenvolvido. No acto Feijóo descubriu unha placa cos nomes dos catro cooperantes galegos, recordando o seu traballo nas rexións máis vulnerables.

A homenaxe celebrouse coincidindo co Día do cooperante, pero o presidente destacou que non se debe esquecer que todos os días son o día do cooperante, e a importancia de traballar para que realicen as súas accións nas mellores condición posibles, garantindo o cumprimento de todos os seus dereitos.

Feijóo destacou que o Goberno galego seguirá promovendo o fortalecemento do sector, e traballando cara a profesionalización dos cooperantes para garantir o alcance dos obxectivos marcados. A Xunta de Galicia é consciente que a cooperación é necesaria, e por iso, a pesar do difícil panorama económico nacional, aposta por seguir destinando esforzos a esta área.

En tal sentido, recordou que o goberno galego dedica 11,5 millóns de euros no Plan anual da cooperación galega para o desenvolvemento 2009 nesta materia co desexo de dar un salto cualitativo na cooperación. A intención do goberno e apostar máis por proxectos de medio-longo prazo, e non tanto por accións de curto prazo e menor dimensión.

Feixóo fixo fincapé na necesidade da complicidade e a colaboración entre o goberno e os cooperantes, destacando a importancia da boa relación entre os diferentes pobos, e o papel que neste eido xogan os cooperantes como rostro solidario das accións do goberno galego.

Ao acto asistiron familiares dos catro cooperantes falecidos, representantes institucionais e membros do terceiro sector galego, agradecendo o Goberno galego a todos eles a súa participación.