Segundo explicou a Europa Press o portavoz do sindicato, Juan Hidalgo, a convocatoria de paro comezou a fraguarse "fai xa dous anos", tempo durante o que o SOI estableceu redes con organizacións sindicais e de representación de inmigrantes de Estados Unidos e Europa que contribuíron na preparación das xornadas de paro.
Ás poucas horas de coñecerse a convocatoria, que xa está circulando por Internet, "son xa cen as organizacións que se sumaron" a esta iniciativa que segundo Hidalgo, aspira a ser "non unha revolución, senón unha rebelión pacífica" para reivindicar unha sensible melloría nas condicións do colectivo.
En concreto, os promotores piden "a derrogación das leis de estranxeiría e normativas similares e o cumprimento fiel do artigo 13 da Declaración Universal dos Dereitos Humanos", así como unha "amnistía xeral e regularización de todas as persoas 'sen papeis'"; o recoñecemento de "dereitos laborais" e a "persecución dos empresarios que abusan dos traballadores inmigrantes".
Así mesmo, reivindican o dereito ao voto por arraigamento, esixen o peche dos Centros de Internamento de Estranxeiros e Centros de Estancia Temporal de Inmigrantes e piden que se persigan "a corrupción e/ou os malos tratos institucionalizados e xeneralizado en consulados, subdelegacións do Goberno" e demais dependencias das administracións central e rexionais.
A legalización e regulación laboral do exercicio da prostitución; a prohibición de repatriar menores inmigrantes, o cesamento do "racismo e a xenofobia institucional que criminaliza" ao colectivo e "traballo real para evitar máis mortes no Estreito e augas do Atlántico, sen externalización de fronteiras nin Frontex", completan as reivindicacións.
Hidalgo, que vaticina un éxito da convocatoria, animou a todo o colectivo inmigrante en situación regular ou irregular, a explicar aos empleadores a importancia de secundar unha folga como esta xa que "é un dereito fundamental básico recoñecido polo Constitucional" e servirá "por apoiar aos compañeiros que están moito peor".
Fonte: CanalSolidario