Mulleres galegas representativas do mundo da política e da cultura, como a escritora Rosa Aneiros, a directora xeral de Cooperación Exterior Fabiola Sotelo, a secretaria de Igualdade da Vicepresidencia Carme Adán, a concelleira de Medio Ambiente de Santiago Elvira Cienfuegos, a presidenta de Implicadas María Reimóndez, a directora do Servizo Galego de Igualdade Ana Luísa Bouza, Pilar Estevez da Marcha Mundial das Mulleres de Galicia e Carme Vidal, representante da Consellería de Cultura e Deporte, uniranse este sábado, a partir das 11 da mañá, na actividade O CAMIÑO DA AUGA. A actividade consiste nunha peregrinación simbólica cargando cos colectores de auga cheos como os que levan as mulleres en Etiopía, nun xesto de solidariedade e nunha forma de visibilizar esta situación de precariedade na que viven mulleres e nenas en Etiopía (país onde Implicadas no desenvolvemento traballa en proxectos de cooperación dende o ano 2003) e contribuír ao proxecto "Xestión comunitaria da auga dende o punto de vista do xénero en Moloxi (Etiopía)" que apoirá Implicadas no desenvolvemento neste país.
1º tramo: Porta do Camiño ata Nº 14 de Casas Reais: Levan as garrafas as mulleres.2º tramo: Nº 14 Casas Reais ata Praza de Cervantes: Voluntariado de Vigo.3º tramo: Praza de Cervantes ata Praza do Obradoiro: Voluntariado de Lugo.4º tramo: Esquina Praza do Obradoiro ata metade Obradoiro: Rapazas da danza.5º tramo: Praza do Obradoiro ata Praza Praterías: Voluntariado de Vigo.6º tramo: Praza Praterías ata Praza da Quintana: Mulleres
Participación cidadáAdemais da participación destas mulleres, na actividade O CAMIÑO DA AUGA está invitada a participar toda a cidadanía, que tamén poderá tomar parte doutros actos que se desenvolverán dende as 10.30 da mañá na praza de Cervantes, na praza de Praterías e na praza do Obradoiro, organizados polos grupos de voluntariado de Implicadas no desenvolvemento. A partir das 11 da mañá procederase a encher os colectores de auga na fonte da Porta do Camiño, e comezará a peregrinación, á que tamén pode unirse toda a cidadanía en calquera momento do percorrido. A peregrinación simbólica comezará ás 11 na Porta do Camiño, dende onde se irá á praza de Cervantes (pola rúa das Casas Reais), e dende Cervantes irase até a praza de Praterías (pola rúa Acibecherías), para ir despois até a praza do Obradoiro, e coller a rúa de Fonseca para chegar finalmente á Praza da Quintana. Tralo percorrido, a praza da Quintana acollerá a lectura dun manifesto no que se explicará a gravidade da situación en Etiopía no tocante a este tema. A continuación, actuará o grupo etíope de danza contemporánea ADUGNA, que viaxa a Galiza nesas datas precisamente para o acto.