Mellora das condicións hixiénico sanitarias, de saneamento e ambientais de 489 familias (2.445 persoas aprox.) no sector de Santa Lucía, barrio Cienfuegos, Santiago dos Cabaleiros, provincia de Santiago, República Dominicana

A intervención de Jacarafe e ACPP no barrio de Santa Lucía iniciouse en 2008, coa execución do Programa Integral de Mellora do Barrio Santa Lucía, que se alargou ata 2010. Con este proxecto preténdese dar continuidade ao traballo realizado co programa, nas seguintes áreas de actuación:

- Saneamento: Este proxecto pretende continuar coa construción do sistema de rede de sumidoiros que dará servizo ao barrio de Santa Lucia. A obra, dividida en fases para mellorar a súa viabilidade na consecución de fondos, será executa pola Corporación de Augas e Redes de sumidoiros de Santiago dos Cabaleiros (CORAASAN), institución responsable da auga e da rede de sumidoiros en Santiago. O sistema, unha vez finalizado, permitirá aos veciños do barrio unha recollida de augas sucias e o seu envío á planta procesadora de Cienfuegos. Isto mellorará as condicións hixiénicas e de saneamento do barrio, erradicando do barrio solucións sanitarias ineficaces e contaminantes. A fase que se presenta consta da instalación de 1.077,59 metros lineais de rede de sumidoiros secundaria e a súa conexión ao colector principal (xa executado). Unha vez posto en funcionamento o sector instalado dará cobertura a un terzo da poboación. Os beneficiarios implicaranse nas obras a través do Comité da Rede Sumidoiros que se creará para dar apoio loxístico ás obras e manter informado ao barrio das mesmas.

- Saneamento ambiental e hixiene comunitaria: Preténdese dar continuidade ao programa de capacitación a través da rede de promotores. Os promotores actúan como elementos multiplicadores dentro do barrio das formacións e sensibilizacións recibidas, ademais de estruturar o tecido social do mesmo, apoiar a integración dos novos habitantes ao mesmo e mitigar os conflitos. Os promotores realizarán esa transmisión de coñecementos a través de charlas e visitas domiciliarias, nas que se traballarán cos últimos coñecementos adquiridos pero tamén cos adquiridos ao longo de toda a execución do Programa. Co presente proxecto capacitarase aos promotores concretamente en uso e manexo de rede de sumidoiros sanitaria, metodoloxías de sociabilización, equidad de xénero e democratización dos roles domésticos e desenvolvemento ambiental con enfoque de xénero. Na presente fase quérese seguir incidindo na equidade de xénero e procurar mellorar a integración da muller na toma de decisións do barrio, así como diminuír a problemática relacionada co xénero existente.