Fortalecemento da capacidade financeira de Taller de Solidaridad en Galicia

O presente proxecto aborda a mellora da capacidade financeira da Fundación Taller de Solidaridad en Galicia, reducindo a dependencia da organización dos fondos públicos e tratando de diversificar as fontes de ingreso privadas de xeito que ningún dos aportes privados á mesma represente máis do 30% dos seus recursos.

Para conseguir a meta fixada, o proxecto afronta a posta en marcha dunha campaña de captación de socios e socias que aborde, entre outras cuestións, a análise do perfil das persoas asociadas para definir mellor as actuacións de captación, accións de aumento de cota e de fidelización da base asociativa actual, accións 2.0, así como tamén a formación de persoal asalariado e voluntario en captación de socios e fondos privados. A campaña pretende aproveitar o potencial que supoñen os centros educativos das Siervas de San José, congregación que promove a fundación, como plataformas aglutinadoras de posibles asociados e asociadas.

Asemade, o proxecto inclúe o deseño e a execución dunha campaña comercial para a venda de produtos publicitarios e roupa deportiva dirixida a entidades públicas e privadas, como son centros educativos, asociacións, ONG, clubs deportivos ou escolas municipais. Esta liña de traballo contribuiría tanto ao obxectivo de incrementar a independencia financeira de Taller de Solidaridad como ao de consolidar a súa importadora de comercio xusto, estando ambos obxectivos recollidos no seu Plan Estratéxico 2012-2014.