Proxecto de fortalecemento da lexitimidade social de ESF Galicia: transparencia, comunicación e base social 2012

O proxecto pretende contribuír ao fortalecemento de Enxeñería Sen Fronteiras Galicia (ESF Galicia) nas áreas que se consideran prioritarias actualmente para a organización así como á mellora do sector da cooperación ao desenvolvemento en Galicia. Este aborda tres liñas principais que son a transparencia e bo goberno de ESF Galicia, a mellora da comunicación externa da asociación e o fortalecemento e ampliación da súa base social.

En primeiro lugar, os indicadores de transparencia e bo goberno definen un horizonte que as organizacións do terceiro sector deberán cumprir nos próximos anos. No caso de ESF Galicia, a asociación ten o compromiso de cumprilos durante o ano 2012 para garantir a permanencia da Federación Española de Ingeniería Sin Fronteras, da que forma parte, na Coordinadora Española de ONGD. Ademais do imperativo legal, os indicadores de transparencia e bo goberno constitúen unha ferramenta de moita importancia, polo feito de que foron elaborados polas propias ONGD e constitúen un compromiso do terceiro sector coa mellora continua no desempeño das súas tarefas.

O segundo eixo de traballo contempla a mellora da comunicación externa da organización. As actividades nesta liña están motivadas pola intención de ESF Galicia de facer chegar a súa mensaxe ao seu público obxectivo. Actualmente existen moitas canles de comunicación que permiten chegar de forma case inmediata a un público moi amplo. Por outra banda, a grande cantidade de información que diariamente se nos transmite a través desas canles fai necesaria unha planificación detallada da estratexia de comunicación, polo que a actividade máis importante desta liña é a elaboración dun plano de comunicación da organización, que recolla tanto os obxectivos a medio prazo como as metodoloxías que se empregarán para conseguilos.

A terceira liña deste proxecto é a ampliación e fortalecemento da base social da asociación. ESF Galicia entende o asociacionismo como unha ferramenta de transformación social, polo que se considera interesante tanto aumentar o número de persoas que participen dalgún xeito da asociación como mellorar a súa formación e a boa comunicación entre actores internos. Neste eixo se propoñen actividades de difusión da misión e valores da organización, accións formativas dirixidas ao voluntariado da asociación e traballaranse estratexias novidosas de cara a unha comunicación máis bidireccional e unha consecuente motivación da participación das persoas socias.

Este proxecto pretende, polo tanto, o fortalecemento dos procesos estratéxicos de ESF Galicia, contemplados tanto na vixente planificación estratéxica 2008-2013 como presentes no proceso participativo con motivo da elaboración da nova. A realización deste proxecto contribuirá polo tanto a unha mellora xeral da asociación tanto de forma interna como na súa proxección exterior.