Mellora do acceso aos sistemas de auga potable e saneamento en tres comunidades do distrito de Mollepata, provincia de Anta, Cuzco. Perú

O proxecto busca o desenvolvemento de 100 familias que viven en extrema pobreza en tres comunidades rurais do distrito de Mollepata, na provincia de Anta. Actúase no sector de cobertura das necesidades básicas e concretamente no acceso á auga, ao saneamento e á habitabilidade. O obxectivo é garantir o dereito a unha vida digna, unha vez identificados como principais problemas os vencellados á saúde relacionados coa deficiente dispoñibilidade de auga e saneamento. Así, o proxecto céntrase en reducir a prevalencia de enfermidades diarreicas e parasitarias en tres comunidades mediante a dotación de infraestruturas menores para a instalación de tanques elevados de almacenamento de auga e servizos hixiénicos con biodixestores. Ao mesmo tempo fortaleceranse as capacidades locais en xestión, operación e mantemento dos sistemas instalados, así como en educación sanitaria e saúde ambiental, co propósito de reforzar a adopción de prácticas saudables a nivel individual, familiar e da comunidade.

O enfoque de intervención do proxecto contempla accións a nivel do fogar e da comunidade, así como un traballo participativo e concertado cos actores locais claves. Considerando á poboación destinataria como o actor fundamental do proxecto, fomentarase a súa participación activa e democrática durante a execución do proxecto, así como a transferencia de tecnoloxía a fin de asegurar o mejoramiento dos mecanismos de control e de corresponsabilidade. Esta última, necesaria para o mantemento dos servizos de abastecemento de auga e saneamento, está vinculada ao recoñecemento e asunción dos seus dereitos e as súas responsabilidades.

Co proxecto contribuirase ao desenvolvemento do Plan Nacional de Saneamento 2006-2015, mellorando a calidade e sustentabilidade dos servizos de auga potable, e disposición de excretas, en concordancia tamén co Plan Nacional de Superación da Pobreza e as políticas Décimo Terceira e Vixésimo Primeira trazadas no Acordo Nacional e os Obxectivos de Desenvolvemento do Milenio; principalmente coa Meta 10 do Obxectivo 7 que propón reducir, ao 2015, a metade da porcentaxe de persoas que carecen de acceso sostible á auga potable e aos servizos básicos de saneamento.