Fortalecemento da investigación e formación académica en Cabo Verde para favorecer un desenvolvemento mariño sostible

A investigación e a formación académica aplicada favorecen a definición e o impulso de estratexias sostibles para o desenvolvemento sectorial. Cabo Verde conta con institucións académicas e de investigación que recollen o sector mariño como prioritario e que se atopan en diferentes fases do proceso de definición e aplicación de estratexias específicas dirixidas a contribuír ao desenvolvemento sostible do sector.

O Instituto Nacional de Desenvolvemento das Pescas (INDP) e a Universidade de Cabo Verde, a través de, entre outros, o seu Departamento de Ciencias do Mar, teñen definidas liñas de investigación concretas e programas de formación. Con todo, non contan con profesionais doutorados suficientes que lle outorguen un nivel de calidade superior á investigación e á formación. Este proxecto pretende contribuír ao desenvolvemento sostible do sector mariño e das persoas que dependen da súa explotación, a través do reforzo da investigación e da formación.

As actividades baséanse na transferencia de coñecementos desde o Campus do Mar, co fin de fortalecer ás institucións beneficiarias. Preténdese deseñar e por en marcha un programa de doutoramento relacionado co sector do mar, concretamente, estableceranse unha serie de resultados enfocados cara á formación de doutores que poñan en marcha liñas de investigación e formación, a creación dun programa de doutoramento en Cabo Verde, o reforzo das capacidades do persoal docente e investigador, e o fortalecemento tanto dos plans de docencia universitaria relacionados co ámbito costeiro e mariño, como das liñas de investigación concretas e aplicadas nestas mesmas áreas.

O Campus do Mar, Campus de Excelencia Internacional, apoiará ao Instituto Nacional de Desenvolvemento das Pescas e á Universidade de Cabo Verde na consecución dos resultados anteriores.