Proxecto de mellora da sustentabilidade da actividade marisqueira como fonte de ingresos de 7 grupos de mulleres marisqueiras nos municipios de Amapala, San Lorenzo e Marcovia, Honduras

O proxecto consiste na mellora da actividade marisqueira de sete grupos liderados por mulleres que realizan a actividade de xeito tradicional supoñendo unha fonte principal de ingresos para as súas familias, dadas as circunstancias de deterioro ambiental, perda de produción e ingresos que se vén dando nos últimos anos e ameazan dito modo de vida. Así mesmo, estableceranse metodoloxías e proxectos piloto de cultivo de moluscos, mellora da calidade, comercialización e imaxe do produto, mecanismos de ordenación da actividade e xestión dos espazos naturais para a rexeneración con criterios de gobernanza, incluíndo aspectos relativos á seguridade e vixianza do cumprimento da normativa ambiental e de pesca.

A idea do proxecto é avanzar na profesionalización da actividade marisqueira dende unha perspectiva que reúna as seguintes características: profesionalización do sector, valorización do traballo das mulleres na pesca e marisqueo, xestión con respecto á biodiversidade e baixo parámetros de sustentabilidade ambiental; comercialización legal que cumpra as normas fiscais, sanitarias e hixiénicas do produto, integración das institucións normadoras e xestoras para avanzar cara á formalización de normas de protección e fomento da rexeneración natural dos recursos, sentando as bases para avanzar no futuro cara a ordenación marisqueira e dos recursos marino-costeiros a través dunha experiencia piloto en Amapala.

O proxecto enfócase nos seguintes aspectos:

-Avanzar na formalización e legalización dos grupos, na súa capacidade de xestión organizativa e técnico-produtiva e eficiencia, a través de módulos específicos de formación adaptados á situación e requirimentos individuais de cada grupo,

-Mellorar a capacidade produtiva dos grupos de mulleres a través de dúas compoñentes principais: mellora da capacidade de rexeneración do produto en espazos naturais usados para a captura de moluscos, e mellora da capacidade de produción mediante cultivo de moluscos en zonas controladas polas mulleres que se adican á recollida de sardiña en estruturas especiais denominadas chiqueros, así como en praias e outros lugares abertos que se seleccionarán ao efecto.

-Xerar mecanismos de gobernanza que combinen os esforzos de sociedade civil (organizacións e mariscadoras) e institucións académicas e normadoras, de cara a iniciar procesos de ordenación marisqueira.