A Xunta colabora con ACNUR, UNRWA e UNICEF para levar a cabo actuacións no exterior de loita contra a violencia de xénero

• Os convenios enmárcanse no Pacto de Estado contra a Violencia de Xénero e na colaboración entre a Consellería de Presidencia, Xustiza e Deportes e a Consellería de Política Social e Igualdade 
• Mulleres e nenas vítimas de violencia de xénero da República Democrática do Congo, Uganda e Palestina beneficiáronse nos últimos anos das actuacións 
• O investimento destinado a estes convenios desde 2019 no marco do Pacto de Estado contra a Violencia de Xénero supera os 1,5M€ 

Santiago de Compostela, 24 de novembro de 2024.- Con motivo do 25N, Día Internacional para a Eliminación da Violencia contra as Mulleres, que se conmemora mañá, a Xunta conta cunha programación de 300 actividades previstas para todo o mes de decembro. Na loita contra esta lacra, o Goberno galego reforza as medidas e recursos dispoñibles para garantir a atención ás vítimas a través de distintas liñas de axudas.

Neste sentido, no marco do Pacto de Estado contra a Violencia de Xénero, a Xunta mantén desde 2019 a colaboración na loita contra a violencia de xénero con apoio a proxectos da Asociación España con ACNUR, a Asociación UNRWA España e a Fundación UNICEF, todas elas vinculadas ao sistema de Nacións Unidas, coa sinatura dos respectivos convenios. O orzamento dos acordos sumou neste ano 252.000 euros, 84.000 euros cada un deles.  Desde 2019, o investimento realizado para financiar proxectos de acción humanitaria  a través desta vía supera os 1,5 millóns de euros.

O apoio á Asociación España con ACNUR, permite loitar contra a violencia sexual e a discriminación contra as mulleres na República Democrática do Congo-RDC. As intervencións céntranse na formación de representantes de estruturas comunitarias da poboación refuxiada; na mellora do acceso a servizos de protección por parte de sobreviventes de violencia sexual e de xénero; ou na realización de actividades para a inserción socio-económica das mulleres vítimas con iniciativas de mobilización comunitaria para a erradicación da violencia sexual e de xénero.

Pola súa banda, a Fundación UNICEF continúa co seu traballo na creación de servizos integrados para a prevención e resposta aos problemas de protección da infancia, incluída a violencia de xénero, nos primeiros convenios de colaboración no distrito de acollida de refuxiados de Yumbe, e actualmente no Distrito de Karamoja, ambos os dous en Uganda. Entre as estratexias empregadas que contribuíron a reforzar este sistema destaca a celebración de reunións periódicas de coordinación multisectorial dirixidas polo Goberno local do distrito, a remisión para a xestión dos casos de protección da infancia e a formación e titoría das estruturas comunitarias e os provedores de servizos (sanitarios, policía e benestar social) co obxectivo de mellorar as capacidades de resposta aos riscos e necesidades de protección infantil.

Por último, a Asociación UNRWA España dará continuidade coa dotación deste ano á intervención de protección e atención fronte á violencia machista para as mulleres vítimas e superviventes de violencia de xénero dos campos de poboación refuxiada de Palestina na Franxa de Gaza. Así, reforzarase a prevención e atención ás vítimas de violencia de xénero mediante un enfoque integral, no que ademais da atención necesaria ás vítimas se realizan actividades de sensibilización comunitaria que promoven a prevención e os cambios estruturais a longo prazo.

Cómpre lembrar que a estes convenios sumouse este ano a posta en marcha en o ano pasado do I Programa Galego de Acollida Temporal  a Mulleres Defensoras de Dereitos Humanos 2023/2024. Trátase da iniciativa Galicia Abriga, co que a Xunta pretende garantir un espazo seguro a mulleres defensoras de dereitos humanos pertencentes a organizacións e movementos sociais de países nos que a Cooperación Galega ten presenza.

O programa enmárcase nun convenio de colaboración entre a Consellería de Presidencia, Xustiza e Deportes e a Consellería de Política Social e Igualdade coas ONGD Solidariedade Internacional de Galicia, Asociación Galega de Comunicación para o Cambio Social (AGARESO) e Asociación Ecos do Sur. O acordo conta cunha dotación de máis de 50.500 euros, dos que a Xunta achegou máis de 48.000 euros.