Fortalecemento do dereito á saúde da poboación refuxiada Palestina máis vulnerable (especialmente mulleres e nenos/as) mediante o apoio a tres Puntos de Saúde en Cisxordania

O presente proxecto busca apoiar o mantemento durante 12 meses de tres puntos de saúde de Beit Our, Bodrus e Ramadeen. Os dous primeiros no gobernorado de Ramallah, nas áreas de Jericho e Xerusalén e o terceiro no gobernorado de Hebron, en Cisxordania (tPo). Estes puntos están situados en zonas rurais e illadas, sen acceso a servizos sanitarios para prestar atención en saúde primaria á poboación refuxiada de Palestina de zonas nas que Israel exerce o control e non permite o movemento da poboación para recibir os servizos de saúde. Os tres centros sitúanse no área B, baixo control civil da Autoridade Palestina e control militar de Israel. Nestas zonas a poboación sofre o acoso nos checkpoints, para desprazarse aos centros de saúde e necesitan permiso das autoridades de Israel para poder acudir a Xerusalén para ser atendidos nos hospitais.

O proxecto céntrase en prestar atención sanitaria en saúde primaria cun enfoque familiar e en saúde materno infantil, na que se presta atención en planificación familiar, atención a mulleres que queren quedar embarazadas, atención perinatal e atención postnatal a nenos e nenas ata os 12 meses. E, finalmente, atención a persoas con enfermidades crónicas non transmisibles. Ademais disto, un equipo de saúde realiza actividades de prevención e de promoción dun estilo de vida saudable con actividades comunitarias.