Articulación da produción e o consumo dos produtos agropecuarios locais, mediante o desenvolvemento dunha ruta agroalimentaria gastronómica ao longo da estrada interoceánica sur, entre os distritos de Ccatcca e Ocongate, Cusco – Perú"

Este proxecto é parte da aposta institucional para superar a pobreza e exclusión da poboación rural da provincia de Quispicanchi mediante a diversificación produtiva, a agregación de valor e a articulación ao mercado da produción agropecuaria e agroindustrial rural; concretamente entre os distritos de Ccatcca  e Ocongate, articulando a produción e o consumo dos produtos agropecuarios locais, baixo un enfoque de desenvolvemento económico local inclusivo e produción sustentable.

Para o éxito desta estratexia, que permitirá o incremento dos produtores/as e emprendedores/as, traballarase a tres niveles: 1. A produción agropecuaria e agroindustrial 2. As canles de comercialización local e 3. Os gobernos e actores locais. En canto á produción agropecuaria e agroindustrial, o obxectivo é que os produtores e produtoras desenvolvan capacidades para mellorar a calidade dos seus produtos e a xestión de unidades produtivas. Respecto das canles de comercialización local, as emprendedoras que operan os restaurantes rurais e tendas de derivados lácteos, desenvolverán capacidades para mellorar a xestión, a atención e os servizos nos seus establecementos. Este desenvolvemento de capacidades complementarase con accións que promoverán o encontro de produtores, produtoras e comercializadores/as en espazos de coordinación para crear sinerxias e facer máis eficiente o proceso de comercialización. Por último, respecto ao traballo con gobernos e actores locais, involucralos desde o inicio para comprometelos no desenvolvemento da proposta e, de maneira conxunta, realizar accións planificadas e coordinadas para a promoción e posicionamento da ruta agroalimentaria e gastronómica do Ausangate.

Na provincia de Quispicanchi , especificamente nos distritos de Ccatcca  e Ocongate, a Asociación Jesús Obreiro (CCAIJO) executou previamente dous proxectos coa Xunta de Galicia, que contribuíron a que as familias campesiñas desenvolveran capacidades para a xeración de ingresos. O presente proxecto vai articular e potenciar os avances que se lograron ata o momento para xerar cambios sustentables na mellora dos ingresos das familias e, ademais, favorecer a dinamización da economía local.

A estratexia para mellorar os ingresos das familias será o desenvolvemento dunha cadea agroalimentaria gastronómica inclusiva. Nesta cadea as produtoras e produtores de cuyes, papas nativas, troita e leite, articularanse con quen dirixe restaurantes rurais e puntos de venda de derivados lácteos e estes, á súa vez, cos consumidores que se mobilizan ao longo da estrada interoceánica sur. É dicir, a oferta agropecuaria e agroindustrial articularase coas principais canles de comercialización local para atender aos consumidores/as na que xa se empeza a coñecer como ruta gastronómica do Ausangate.