BERTAMIRÁNS ACOLLE MAÑÁ UNHA XORNADA DE ANÁLISE DA COOPERACIÓN DO FONDO GALEGO EN PERÚ
Mañá celébrase na Casa da Cultura de Bertamiráns as II Xornadas de Avaliación que analizarán a actuación do Fondo Galego de Cooperación e Solidariedade (FOGACOSOL) en Perú. Nel participarán membros das Administracións autonómicas e locais con responsabilidade na xestión de cooperación ao desenvolvemento, Organizacións non Gobernamentais para o Desenvolvemento e profesionais do sector para analizar de xeito conxunto o labor que se está a levar no eido da cooperación en Perú.
O programa dá comezo ás 10,00 horas coa inauguración oficial a cargo do Alcalde de Ames, Carlos Antonio Fernández Castro; e coa participación de Xosé Cuns, técnico da Dirección Xeral de Cooperación Exterior da Xunta de Galicia; e de Xosé María Permui, membro da comisión executiva do Fondo Galego. A secretaria do FOGACOSOL, Iria Alonso, pronunciará o primeiro relatorio no que fará unha revisión dos oito anos que esta institución leva traballando en Perú. A continuación, ás 11,00 horas, celebrarase unha mesa redonda coa participación de representantes de diversas ONGD´s que teñen experiencia no traballo solidario neste país andino.
O director financeiro do Centro de Promoción do Desenvolvemento e a Educación (CEPRODE) de Perú, Óscar Pedro Almendáriz León, falará da avaliación dos proxectos desenvolvidos en colaboración co FOGACOSOL e, posteriormente, os alcaldes dos municipios peruanos de San Miguel de Arcos e Atavillos Bajo, William Florencio Ramos e Huber Félix Damián, respectivamente, incidirán no poder local como motor de desenvolvemento en Perú. O peche das Xornadas terá lugar ás 14,00 horas.
Avaliando para seguir mellorando“Avaliando para seguir mellorando” é un encontro organizado polo Fondo Galego de Cooperación e Solidariedade e financiado pola Xunta de Galicia para crear un espazo de encontro entre os distintos axentes da cooperación galega que traballan no mesmo país. A dirección xeral de Cooperación Exterior apoia esta iniciativa por entender que é unha das vías de actuación futura para todo o mundo da cooperación galega. A avaliación axudará ao melloramento e a o incremento da calidade das accións, facendo fincapé alá onde sexan máis necesarias e máis útiles.
Nesta segunda edición márcase como obxectivo analizar os impactos, a eficacia e a sostenibilidade da cooperación levada a cabo polo FOGACOSOL en Perú nos últimos anos; visibilizar as fortalezas e as debilidades destas accións e contar coa información e opinión de primeira man dos organismos peruanos que coactuan nestes proxectos.