- A edil de Ramala e experta en xénero pon o foco na situación das mulleres, que mesmo chegan a dar a luz nos check-points debido ás restricións de mobilidade
- Convidada polo Fondo Galego de Cooperación, está a manter encontros en Trives, Allariz, Culleredo, Abegondo, Santiago, Muros, Silleda e Soutomaior
Hanan Kaoud, concelleira de Ramala (Cisxordania) e experta en xénero, percorre esta semana oito concellos socios do Fondo Galego de Cooperación e Solidariedade para denunciar o conflito e explicar a situación das donas. Baixo o título ‘Visita ao Norte. A voz resiliente das mulleres palestinas’, xa se desenvolveron encontros abertos á cidadanía na Pobra de Trives, Allariz, Culleredo e Abegondo. Esta mañá celebrarase unha recepción institucional en Santiago de Compostela, mentres que as charlas continúan pola tarde en Muros e mañá en Silleda e Soutomaior.
A evolución dos mapas que mostra Hanan Kaoud ao inicio das súas conferencias evidencia como a poboación palestina foi e segue a ser expulsada do seu territorio, coa creación de asentamentos de colonos israelís que fragmentan o espazo. “Róubannos as terras e restrinxen a mobilidade colocando cancelas de ferro que pechan de xeito aleatorio, obrigándote a agardar durante horas”, explica a edil cisxordana, e engade que “mesmo hai mulleres que dan a luz nos check-points porque non as deixan pasar”.
De feito, para ela “o xenocidio non comezou en 2023, senón moito antes”, e denuncia que o publicitado alto o fogo non é tal, xa que “tanto en Gaza como en Cisxordania continúan os bombardeos”, contribuíndo a diseminar a poboación. “Nas miñas investigacións entrevistei a mulleres que antes soñaban con volver á súa terra de orixe, pero agora só queren regresar aos campos de refuxiados para reunir á súa familia”, expresa a convidada cisxordana.
“Israel quere a poboación palestina ou fóra da terra ou baixo terra, ese é o seu proxecto colonial, e Estados Unidos busca facerse co canal para controlar as rutas comerciais”, sostén Hanan Kaoud. “Diversas resolucións da ONU declaran ilegal a ocupación e recoñecen o dereito ao retorno, pero non se están a cumprir”, insiste. Neste senso, “o que deben facer os estados europeos é deixar da vender armas a Israel e recoñecer o Estado Palestino, como xa fixo España”.
A día de hoxe, “a axuda humanitaria comezou a entrar en Gaza, pero é totalmente insuficiente: non teñen acceso a comida, auga, , electricidade, refuxio, sanidade...”, explica a concelleira de Ramala, cidade que tamén acolle a persoas desprazadas. “Gaza leva décadas vivindo baixo asedio”, lembra, e engade que “o número de mortos nos dous últimos anos son moitos máis dos 70.000 que se di”, xa que seguen buscando corpos baixo os cascallos.
Neste contexto, “as mulleres sofren por partida dobre, xa que ás prácticas colonizadoras súmanse as desigualdades e a violencia de xénero”, explica Kaoud, e lembra que “mesmo unha ministra Israelí avougou por asasinar ás mulleres palestinas porque considera que traen terroristas ao mundo”. “Eu mesma, como política, sufro acoso e violencia”, declara. Sen embargo, “mantémonos fortes e mobilizadas”, asegura, e avoga por “deconstruír as relacións de poder tanto na casa como no eido institucional e na comunidade”.
Hanan Kaoud valora enormemente as mobilizacións da sociedade civil en diversos países europeos e tamén as iniciativas de gobernos locais como as charlas que está a impartir en Galicia, xa que “este tipo de accións nos dan forza e son fundamentais para apoiar a causa”, asegura. “Imos seguir loitando pola nosa dignidade. Só cando pare a ocupación seremos libres. A ocupación é ilegal e ten que parar”, conclúe, emocionada, cada un dos encontros.
O Fondo Galego
O Fondo Galego de Cooperación e Solidariedade está integrado por 118 concellos e as catro deputacións de Galicia, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur Global e a sensibilización da sociedade galega a prol da solidariedade internacional. Recoñecido como axencia municipal da cooperación galega, o Fondo Galego vén de cumprir 28 anos tendo apoiado uns 200 proxectos en máis de trinta países e promovendo numerosas actividades e materiais en relación aos desequilibrios Norte-Sur e a Axenda 2030.
AXENDA PREVISTA
Mércores 12/11
Santiago de Compostela - Pazo de Raxoi. 11:30h Recepción institucional.
Muros - 17:00h. Local Social de Sorribos (Abelleira). Charla-café con Hanan Kaoud.
Xoves 13/11
Silleda - Casa do Concello. 10:30h Recepción institucional. 11:00h Encontro con Hanan Kaoud.
Soutomaior - 19:00h. Multiusos de Arcade. Encontro con Hanan Kaoud.
