Aprobado por unanimidade no Parlamento de Galicia o 24 de abril de 2006, de conformidade co establecido no artigo 15 da Lei 3/2003, do 19 de xuño, de cooperación para o desenvolvemento.
O Parlamento de Galicia vén de aprobar por unanimidade o primeiro Plan director da Cooperación Galega que regulará e ordenará as actuacións nesta materia entre 2006 e 2009. Elaborado pola Dirección Xeral de Cooperación Exterior, inclúe a práctica totalidade das propostas feitas polos actores neste sector e recolle as emendas introducidas polos grupos parlamentarios da Cámara autonómica galega.
O Goberno galego fixouse o propósito de incrementar de xeito sostible os recursos públicos dedicados á axuda ao desenvolvemento. Con esta finalidade, comprometeu un incremento dos fondos dedicados á cooperación ata acadar o 0,4% dos orzamentos da Xunta no horizonte desta lexislatura. Para dar cumprimento a esta vontade, estableceu no texto do Plan director que se respectará un incremento anual mínimo do 50% con respecto ao exercicio anterior.
O Plan Director para a Cooperación Galega marca as estratexias da cooperación galega seguindo as prioridades xeográficas e sectoriais marcadas pola Dirección Xeral de Cooperación Exterior co respaldo unánime dos tres órganos asesores establecidos pola Lei galega de Cooperación -a Comisión Interdepartamental de Cooperación ao Desenvolvemento (CINCODE), a Comisión Interterritorial de Cooperación para o Desenvolvemento (CINTERCODE) e o Consello Galego de Cooperación para o Desenvolvemento (CONGACODE)-. Estas comisións, nas que están representadas os organismos da sociedade civil e as administracións local e autonómica, aprobaron o texto por unanimidade en febreiro de 2006.
Misión e principios
Misión
Mediante a cooperación para o desenvolvemento, a sociedade galega pon a disposición dos pobos máis pobres do planeta a súa experiencia histórica, os seus valores, activos e recursos; sumándose aos procesos existentes para combater a pobreza e as súas causas, promovendo activamente o dereito ao desenvolvemento, humano e sostible.
Principios
- O ser humano debe constituír o centro dos esforzos do desenvolvemento
- O desenvolvemento constitúe un proceso multidimensional e non simplemente económico
- O desenvolvemento tense que concibir como opción de realización dos pobos
- O desenvolvemento constitúe unha responsabilidade compartida
- A xustificación última do proceso de desenvolvemento descansa na conquista efectiva dos dereitos para as persoas
Criterios xerais
- O desenvolvemento perténcelle a cada pobo
- A axuda é un compromiso entre doador e receptor
- Promover a apropiación polos beneficiarios
- Impulsar a participación social
- Fomentar a autonomía do receptor
- Coordinación e complementariedade de actores
- Coherencia das actuacións públicas cos OD
- Transparencia, eficacia e eficiencia
- Resposta ás liñas de acción exterior, galegas e estatais
- Integrar aos actores, respectando a súa independencia
