Alianzas acuícolas entre o sector cooperativo, para o crecemento económico e a redución de impactos ambientais en zonas de áreas protexidas de Chinandega

Este proxecto traballará con 12 cooperativas do sector pesqueiro e acuícola situadas en 2 municipios do departamento de Chinandega (El Viejo y Somotillo), como parte das accións de fortalecemento do sector pesqueiro e acuícola que Amigos da Terra e Fundación LIDER están desenvolvendo tanto nos sectores de intervención, como no territorio en xestión, no contexto das crises a nivel sanitario (provocada pola Covid-19), sociopolítica e económica. En conxunto, o proxecto busca mellorar a produtividade e a sustentabilidade das cooperativas artesanais de pargo e camarón, co obxectivo de favorecer a competitividade e a cooperación local do sector, e desta forma, contribuír ao desenvolvemento económico, social e ambiental das familias campesiñas que habitan as zonas costeiras do departamento de Chinandega. Todo iso, a través dun enfoque de innovación e investigación social, e promovendo a participación e liderado da muller no sector pesqueiro e acuícola da  zona de intervención. Isto traducirase en tres Resultados Esperados: o fomento das sinerxias entre cooperativas pesqueiras para a xestión de áreas protexidas con equidade de xénero e perspectiva ecolóxica; o fortalecemento de procesos de produción en granxas artesanais acuícolas a través de asistencia técnica, investimentos produtivos e labores de investigación; e a mellora das alianzas entre compradores de produtos pesqueiros e cooperativas, con vistas a mellorar a comercialización e os ingresos destas últimas.