A Axenda 2030, un reto local nun mundo en transformación III

Este proxecto ten como obxectivo específico promover a implicación dos concellos e deputacións galegas na consecución dos ODS e na cooperación ao desenvolvemento, buscando sinerxías coa administración local e rexional dos países da Lusofonía. Para isto, fundaméntase en dúas dimensións:

1) Por unha parte, na integración e implementación dos Obxectivos de Desenvolvemento Sostible na política municipal, continuando unha práctica comezada xa no 2020, e que se basea na elaboración de plans municipais para a implementación dos ODS. Ademais, celebrarase a terceira edición do curso piloto arredor da localización da Axenda 2030, dirixido a persoal técnico dos concellos e deputacións. Ao mesmo tempo, os ODS estarán presentes tanto na elaboración da ‘Memoria 2021’ -onde os proxectos de cooperación e as actividades de sensibilización se vinculan ás distintas metas globais- como da Axenda 2022, que repasará a traxectoria do Fondo Galego de Cooperación e Solidariedade no seu 25º aniversario. Ambos os dous materiais serán amplamente distribuídos física e virtualmente.

2) Por outra parte, no relativo á  promoción da implicación e a responsabilidade das deputacións e concellos galegos coa Cooperación ao desenvolvemento e difusión da Axenda 2030, proponse continuar impulsando a Rede de Autoridades Locais da Lusofonía polos ODS, que xermolou no “Foro da cooperación municipalista da Lusofonía” organizado en 2019 co financiamento da DXRREEeUE. Nesta anualidade o III Foro da Cooperación Municipalista da Lusofonía será realizado na cidade caboverdiana de Mindelo.