AXUDA DE EMERXENCIA PARA DAMINIFICADOS DO TERREMOTO EN HAITÍ DA FUNDACIÓN AMIGOS DE GALICIA COA COLABORACIÓN DOS CONCELLOS DE PALAS DE REI E A BAÑA

Os efectos do terremoto do 12 de xaneiro foron devastadores; atopados o 25 de xaneiro de 2010, 150.000 cadáveres, máis de 250.000 feridos, un millón de rapaces orfos e máis dun millar de persoas sen fogar, e é considerada unha das catástrofes naturais máis graves da historia.
Neste momentos, as necesidades máis urxentes a cubrir para os damnificados son a de comida e medicinas, tamén tendas de campaña e lonas para a construción de albergues, así como tamén a limpeza do terreo, os servizos médicos e os albergues de urxencia.
O principal colectivo beneficiario deste proxecto serán os rapaces. Xa que só a metade teñen acceso á educación primaria e a maioría teñen a obriga de abandonar os seus estudos a cambio de tarefas de campo. O terremoto deixou a case un millar de rapaces orfos.
A Fundación Amigos de Galicia traballará na distribución de alimentos. O seu ámbito de actuación centrárase no campo Pétionville Country Club, onde hai máis de 50.000 persoas, 15.000 nenos.
Así, a axuda da Fundación Amigos irá encamiñada aos menores, e son susceptibles de ser usuarios tamén aquelas outras persoas que están acollidas no campo Pétionville Country Club.
Enviaranse alimentos tales como peixe en conserva, fabada e pasta, pendas de roupa, ferramentas de traballo, cazarolas, utensilios de cociña, lonas, tendas de campaña, menciñas así como produtos para bebés.
A Fundación Amigos de Galicia colabora coa ONU no campo de Pétionville Country Club, constrúe unha unidade de reposta á urxencia no terreo en coordinación para a distribución de alimentos con Cáritas.
O traballo en terreo permitiralles aos membros da Fundación Amigos de Galicia a atención das necesidades de alimentación da poboación damnificada polo terremoto pero ademais a dita entidade traballará para a identificación e activación de mecanismos e procedementos de coordinación para o desenvolvemento de accións que provoquen un impacto maior en beneficio das vítimas. Cabe destacar que o obxectivo de todas estas actuacións non é só a volta á situación inicial senón tamén a activación dunha resposta por parte da poboación de Haití que provoque unha mellora substancialmente perceptible no nivel de benestar e seguridade do conxunto da poboación, e en particular na seguridade e nivel de benestar dos rapaces. A entidade tamén desenvolverá novos proxectos de axuda á reconstrución da zona.
Ademais, este proxecto será complementario con outros de reconstrución e desentullado no terreo. Con este proxecto preténdese contribuír a mellora das condicións de vida das poboacións afectadas por crises humanitarias, e este é un obxectivo coherente coa cooperación galega e española, ademais de complementario e sinérxico con outros proxectos que poidan desenvolver entidades sen ánimo de lucro españolas