A crise como cambio: perspectivas e alianzas entre mulleres

Este proxecto nace como resultado de 14 anos de traballo de Implicadas no Desenvolvemento a prol dunhas relacións máis xustas entre os pobos dende un compromiso feminista e crítico. No campo crucial da representación, as nosas sociedades seguen promovendo visións das comunidades do Sur que infantilizan, problematizan ou totalizan as experiencias e polo tanto mediatizan a cooperación. Esta situación vese exacerbada no caso das mulleres, que se converten en ferramentas do imaxinario para establecer ao mundo occidental como o sistema de valores modelo para todas as sociedades. Implicadas propón o presente proxecto como unha iniciativa que traballe os campos estratéxicos da representación e as estruturas políticas da pobreza e do xénero, así como a implicación activa da cidadanía como voluntarias e/ou socias da organización. Para cada plano establécense uns obxectivos, resultados e actividades que guiarán o seu traballo ata mediados de 2013, agardando así facer forte o seu traballo como organización, implicando á poboación no voluntariado e no mantemento económico das súas estruturas para facelas así independentes.

Para acadar estes obxectivos, Implicadas propón unha serie de xuntanzas entre as participantes do proxecto de internacionalización posto en marcha pola Rede Galega de Empresas e diversas asociacións de mulleres empresarias, a fin de poñer en común o traballo e os esforzos para saír da crise tanto en Galicia como en Támil Nadu. Por outra banda, a presentación do documental “Cambia de papel” permitirá ás persoas que o visualicen analizar os diferentes papeis que elas mesmas poden desempeñar no seu día a día. No plano formativo, a organización da II Escola Feminista, baixo o tema “Crises e crises”, ofrecerá ás persoas asistentes unha visión máis global da crise (no Norte e no Sur), tanto desde o punto de vista económico como desde o social e cultural, igualmente importantes, aínda que comunmente esquecidos. Organizarase así mesmo un acto conxunto coa Marcha Mundial das Mulleres con motivo do 8 de marzo aproveitando a visita das compañeiras de Támil Nadu, e realizarase unha xuntanza de poetas, ilustradoras e deseñadoras a fin de editar un libro de poesía e imaxes que promova a reflexión nesta liña xeral do proxecto.

Este proxecto pretende amosar os múltiples papeis que a muller pode desenvolver neste contexto, abrindo as portas á formación de redes e alianzas que, ademais de dar voz ás mulleres, poidan traballar para facer fronte ás crises que, como as actuais, van desde o local ao internacional.