Entre-nós

En Ecos do Sur levan dende o ano 1991 desenvolvendo estratexias comúns en migracións e desenvolvemento co obxecto de fomentar a participación do colectivo migrante en tecidos asociativos, acompañado de procesos de articulación transnacional das súas organizacións e redes, prestando especial atención ao papel da muller migrante como promotora dun modelo de desenvolvemento igualitario. Así, o proxecto Entre-nós busca acadar unha maior implicación das asociacións de inmigrantes no desenvolvemento das súas localidades de orixe e acollida. Para isto, as tres liñas de actuación propostas procurarán o fortalecemento do actual tecido asociativo.

En primeiro lugar, realizarase unha fase de diagnóstico da realidade do tecido asociativo en Galicia, co fin de coñecer cal é o seu funcionamento, expectativas e ámbitos de actuación, entre outras. A través do informe final xerado crearanse unha serie de grupos de traballo con esas entidades co fin de deseñar unhas liñas de actuación consensuadas para a mellora da xestión de entidades de inmigrantes galegas.

Na segunda fase do proxecto, iniciarase unha acción formativa que fortaleza as asociacións participantes en materia de xestión asociativa, captación de fondos e introdución ao desenvolvemento e xénero.

Finalmente, crearanse ferramentas de comunicación e apoio para o intercambio de boas prácticas, así como para favorecer unha asesoría personalizada para todas as asociacións de inmigrantes en materia de fortalecemento, codesenvolvemento e enfoque de xénero.

Para dar continuidade ao proxecto, as propias entidades beneficiarias do mesmo poderán seguir adiante neste proceso de adquisición de coñecementos e fortalecemento para emprender novas accións e iniciativas de codesenvolvemento e emprendemento local, presentando proxectos ás distintas convocatorias de subvencións públicas e privadas. Deste xeito se garante o efecto multiplicador das accións emprendidas no proxecto Entre-nós.