Fortalecemento da soberanía alimentaria e do uso racional dos recursos naturais en 10 comunidades da microcunca Quebrada Gallardo, municipio de Namasigüe, departamento de Choluteca, Honduras. Fase II

O proxecto localízase na microcunca da Quebrada Gallardo, no municipio de Namasigüe, pertencente ao departamento de Choluteca en Honduras. Con el preténdese dar continuidade á primeira fase do proxecto para contribuír a impulsar a soberanía alimentaria e o uso racional dos recursos naturais no sur de Honduras, mediante o fortalecemento e a diversificación dos sistemas de produción familiar sostibles, facendo énfase no uso racional dos recursos naturais. Neste ámbito, os principais problemas que afectan á poboación meta son a escasa diversificación e planificación baixo criterios de rendibilidade e sustentabilidade dos sistemas de produción familiar; así como a xestión insostible dos recursos naturais debido á utilización de prácticas inadecuadas, agravada pola escasa concienciación ambiental. Así mesmo, o proxecto ten en conta a debilidade institucional das organizacións e os actores locais encargados do manexo dos recursos naturais da microcunca; ao tempo que contempla a situación de desigualdade entre homes e mulleres en canto ao acceso dos recursos naturais da comunidade.

Para mellorar esta situación o proxecto establece unha serie de actuacións coas que se pretenden fortalecer os sistemas de produción familiar mediante a introdución de cultivos non tradicionais e de produtos orgánicos; implementar medidas para a conservación dos recursos naturais, a través do establecemento de sistemas silvopastorais para o manexo do gando bovino, a creación de parcelas dendroenerxéticas e a construción de ecofogóns mellorados. Por outra banda, o proxecto contempla o fortalecemento das capacidades dos actores locais na xestión dos recursos naturais a través de obradoiros para a elaboración dun plan de continxencia con enfoque de cunca. As accións propostas presentan, ademais, unha liña de traballo na sensibilización e capacitación da poboación sobre a conservación e o acceso equitativo aos recursos naturais con enfoque de xénero.