Fortalecemento das capacidades municipais e de organizacións de base para a planificación e xestión pública de calidade da compoñente auga e saneamento nos 7 municipios da Mancomunidade Nasmar, Honduras.

Proxecto de Enxeñaría sen Fronteiras Galicia agrupada con Universidade da Coruña

O presente proxecto é a fase IV do Programa de Auga de ESF en Honduras, dando continuidade  a outros proxectos executados polo equipo de ESF-Nasmar-Ahjasa-UDC, e financiados pola Xunta de Galicia e outros financiadores. Sen embargo, marca unha evolución nos proxectos de ESF Galicia e a UDC no sur de Honduras respecto ao acceso á auga, debido a dúas circunstancias que se dan no momento actual: a nova normativa de plan municipal, e a presenza no territorio do proxecto Gobernanza Hídrica, da cooperación suíza. Ambas circunstancias ofrecen unhas posibilidades de coordinación e potenciación da labor que se viña desempeñando, polo que con este proxecto preténdese avanzar singularmente na execución do programa auga de ESF.
Para elo, darase continuidade á metodoloxía empregada nos proxectos anteriores, integrándoa e compatibilizándoa coas novas esixencias de plan municipal marcadas polo goberno hondureño. O proxecto aplicarase fundamentalmente a través da coparte aliada de ESF Mancomunidade de Municipios del Sur Nasmar. O proxecto incidirá así nos sete municipios da mancomunidade ao mesmo nivel de intensidade. Preténdese que a planificación hídrica e as ferramentas metodolóxicas que permiten unha xestión transparente e de calidade, estean integradas nos plans xerais dos municipios. Por outra banda, darase unha capacitación intensiva aos equipos técnicos dos sete municipios para que a capacidade de deseño e execución de proxectos de auga sexa efectiva. Estas capacitacións estarán participadas por persoal da UDC, a entidade pública Augas de Galicia, o departamento de Enerxías Renovables e o Instituto de Ciencias de la Tierra, ambos da Universidade Nacional Autónoma de Honduras, entre outros. Acompañarase esta acción da elaboración de manuais de xestión pública para fortalecer procesos de calidade interna, transparencia e bo goberno, e axudar a que no caso de cambio das equipas técnicas municipais, quede un procedemento guía establecido para proseguir as accións.
A última compoñente será a inclusión de medidas de transparencia, veeduría social e bo goberno, que impliquen unha esixencia ás administracións locais para a rendición de contas.