Fortalecemento das capacidades técnicas da Direcção Nacional de Gestão de Recursos Hídricos e das administracións rexionais de auga no ámbito dos SIX, da hidroxeoloxía e hidroloxía. Fase VI. Mozambique

Este proxecto constitúe a fase VI do proxecto SIXHIARA “Fortalecemento das capacidades técnicas da Direcção Nacional de Gestão de Recursos Hídricos e das administracións rexionais de auga no ámbito dos SIX, da hidroxeoloxía e hidroloxía”, financiado pola Xunta de Galicia nas convocatorias de 2012 (Fase I), 2014 (Fase II), 2015 (Fase III), 2016 (Fase IV) e 2017 (Fase V) en Mozambique.
O proxecto ten como fin mellorar a xestión do recurso hídrico en Mozambique a través do fortalecemento institucional das administracións rexionais responsables da xestión dos recursos hídricos (ARA-Sul e ARA-Norte) e da Direcção Nacional de Gestão de Recursos Hídricos (DNGRH). Dito fortalecemento terá como eixo fundamental a mellora do coñecemento do recurso e a potenciación das capacidades de xestión a través da consolidación dun Sistema de Información nacional do Recurso Hídrico (en diante SIRH) e da implementación de metodoloxías e procedementos de análise e cálculo innovadores.

Nesta nova fase intégrase á ARA-Sul como socio local do proxecto, dándolle un forte impulso ao mesmo e acadando así unha maior dimensión, ao ser a ARA de referencia de todo o país, que establece as pautas e metodoloxías de traballo para o resto de ARAs.

As principais liñas de traballo son:

• Desenvolvemento de melloras e consolidación do SIRH formado por tres módulos: Inventario, Utentes e visor web. O sistema, creado nas anteriores fases do proxecto, aumentará as súas funcionalidades e automatizará máis procesos.
• Formación presencial á ARA-Sul (incluíndo as unidades de xestión de concas hidrográficas) e a DNGRH sobre o emprego do SIRH, mantemento informático dos sistemas nos que se aloxa o SIRH e metodoloxías innovadoras de cálculo hídrico.
• Ampliación e actualización da base de datos nacional no SIRH con información actualizada dos recursos hídricos, principalmente de fontes, ríos e concas (estacións hidrolóxicas), presas, embalses e usuarios demandantes de uso de auga.
• Estudo e elaboración dunha metodoloxía de cálculo da demanda hídrica dos principais cultivos en  Mozambique e de caracterización climatolóxica das concas.
• Difusión do SIRH, estudos realizados e cartografía participativa OpenStreetMap (OSM) a outras ARAs do país e a institucións relacionadas coa xestión dos recursos hídricos.