Fortalecemento de capacidades técnicas e operativas para a mellora da xestión dos recursos hídricos en Mozambique (AQUA–MOZ 2ª Fase)

Este proxecto AQUA–MOZ 2ª Fase é a continuación das actuacións anteriores desenvolvidas por AdG, a UdC e a FUAC no marco da xestión da seca en Mozambique. O proxecto pretende contribuír, no marco da loita e prevención contra os efectos do cambio climático, á mitigación dos impactos dos eventos de seca en Mozambique, reforzando a Administración Rexional de Augas do Sur e a Universidade Eduardo Mondlane.

A xestión dos recursos hídricos e o fortalecemento das administracións responsables é unha prioridade en Mozambique. O desenvolvemento de actividades que vinculen melloras técnicas e procesos de xestión nun mesmo plan de acción identificouse como un enfoque exitoso na cooperación galega coa administración da auga de Mozambique.

No marco da loita contra o cambio climático, este proxecto desenvolverá metodoloxías, a nivel técnico e de procedemento, para mellorar a xestión dos recursos hídricos en Mozambique. Para iso, AdG e FUAC-UdC traballarán apoiando á ARA Sur e á Universidade Eduardo Mondlane en dúas liñas complementarias:
    • Seguimento da seca e do estado dos encoros.
    • Procedementos de xestión da seca.

As actuacións identificadas céntranse no reforzo de capacidades -na administración e na universidade- ao tempo que se implantan ferramentas técnicas e de xestión. O enfoque do proxecto fai fincapé na replicabilidade das accións en todo o país co obxectivo de que os beneficiarios locais sexan progresivamente os protagonistas da transferencia de coñecemento a outras administracións mozambiqueñas. Para iso, o proxecto baséase no enfoque de aprendizaxe facendo fronte ás accións nas que se realiza unha actividade ou se entrega un produto sen a adecuada apropiación e capacidade de desenvolvemento por parte dos beneficiarios. En consonancia con isto, os traballos, metodoloxías e procesos a poñer en marcha, na liña de calquera actuación orientada á loita contra o cambio climático, requiren un prazo de tempo que supera a duración deste proxecto (1 ano). Tendo en conta isto, trabállase cun enfoque temporal que se pode ampliar no futuro e que incorpora os resultados de anos anteriores, cunha visión na que AdG e a FUAC-UdC poidan ser actores fundamentais para impulsar a transferencia de coñecemento dende administracións de auga e universidades mozambiqueñas.