Fortalecer a estrutura interna da organización e da liña estratéxica do comercio xusto como paso ao fortalecemento da solidariedade galega

O proxecto pretende contribuír á sustentabilidade de Amarante no relativo á súa base asociativa e financeira como ferramentas de expansión do compromiso da sociedade galega co desenvolvemento sostible e a loita contra os desequilibrios das sociedades actuais.

Un dos obxectivos estratéxicos de Amarante, no que leva traballando os últimos anos e que pretende ampliar no presente proxecto, é a independencia financeira da organización. As accións a levar a cabo neste ámbito son: a diversificación das fontes de financiamento mediante o deseño e execución de dúas campañas de captación de recursos no ámbito privado, unha orientada a conseguir grandes doantes, ou acordos de colaboración en especie con entidades socias; e outra centrada en persoas individuais para animalas a facerse socias.

Ao mesmo tempo, traballarase na ampliación de clientes da distribuidora de comercio xusto da organización e na difusión de información deses produtos. Esta acción, ademais de supor unha fonte de ingresos para a organización, contribúe a espallar o coñecemento sobre o que son os produtos de comercio xusto, os principios éticos e solidarios que o moven e a calidade dos mesmos.

Por outra banda o proxecto contempla a execución de accións formativas dirixidas ao voluntariado, persoal contratado e directiva para a súa capacitación, sensibilización e argumentación de resposta ás situacións de inxustiza social que caracterizan ao mundo actual. Así, a base asociativa de Amarante unha vez formada estará capacitada para coordinar, organizar e dinamizar actividades como accións de rúa ou campañas 2.0 a través das redes sociais. E ao obter un coñecemento máis profundo, terá maior capacidade para transmitir as ideas traballadas nas campañas á cidadanía, lográndose un efecto exponencial da difusión.