Implementación do módulo de hostalería na Escola Técnica integral “San Alonso” da Villa 1º de Mayo. Santa Cruz de la Sierra. Bolivia

O obxectivo da creación do módulo de hostalería na Escola Técnica “San Alonso” é formar homes e mulleres con capacidades técnicas que lles permitan inxerise no mercado laboral. Hai que destacar que a devandita Escola é un centro de carácter integrador, tanto pola inclusión de persoas con discapacidade, como polo especial respecto e protección do factor cultural por parte da comunidade educativa.

Un 80% do alumnado do centro traballa, na súa maioría, na especialidade que estuda. Asemade, este estudantado caracterízase por posuír escasos recursos económicos e vivir en barriadas lonxe da cidade. Na súa meirande parte son persoas adultas integrantes de familias con máis de tres fillos/as e con persoas maiores ao seu cargo.

Na actualidade no centro hai implantadas sete especialidades (beleza; corte e confección; puericultura; mecánica; refrixeración; computación; electricidade domiciliaria e industrial). A decisión de introducir a especialidade de hostalería vén dada polo forte crecemento do sector turístico e a demanda de persoal cualificado que reclama este sector profesional.

Na actualidade en Santa Cruz non existe ningunha escola de hostalería gratuíta á que poida acceder a poboación sen recursos. Así, o obxectivo principal da implantación do módulo de hostalería é formar profesionais en administración de hoteis, chef de cociña, cociñeiros/as e camareiros/as. A duración para a obtención deste título será de dous anos, dividido por semestres.

Á hora de elaborar o plan formativo apóstase polo seu carácter integral e que o alumnado adquira coñecementos en sectores transversais da hostalería. Deste xeito inclúense módulos como seguridade e hixiene no traballo, almacenamento de stocks ou nova cociña.