Impulsando boas prácticas de gobernanza institucional, social e comunitaria na provincia de Kwanza Norte, Angola.

A presente proposta pretende contribuír a un cambio estrutural e sustentable en Kwanza Norte no ámbito da gobernabilidade, a través dunha estratexia integral que fortaleza os escenarios de boa gobernanza xa existentes e incorpore as esixencias sociais en materia de dereitos humanos (principalmente os relacionados coa saúde das mulleres) nas axendas do goberno provincial a través da implantación de accións de incidencia política a nivel municipal, provincial e nacional.

Este proxecto encádrase na estratexia “Novas e outros axentes comunitarios impulsan boas prácticas de gobernanza na provincia de Kwanza Norte” de dous anos de duración en 6 dos 10 municipios da provincia de Kwanza Norte, onde se conta cos indicadores máis baixos en materia de saúde, educación, gobernabilidade e violencia de xénero da provincia. Esta situación permanece inalterable en gran medida, pola falta de espazos públicos de encontro entre a sociedade civil e as autoridades; e por outro, pola débil representatividade da cidadanía nestes foros de participación onde se propoñan medidas estruturais que dean resposta ás súas necesidades, sendo tanto titulares de dereitos como de obrigacións os corresponsables do cambio.

É importante sinalar que estes 6 municipios nos que leva a cabo a actuación servirán de proba piloto para poder, tras unha sistematización das leccións aprendidas, replicar a experiencia nos restantes municipios ou noutras provincias.

En concreto, a través desta proposta, Médicos do Mundo quere contribuír a reforzar a capacidade de traballo en rede das 12 Organizacións de Sociedade Civil (OSC) presentes na provincia de Kwanza Norte que integran a Rede polo Dereito á Saúde, así como a súa capacidade de monitoreo e incidencia nas políticas públicas máis relevantes para a saúde a nivel local. Para iso, levarán a cabo unhas xornadas sobre as políticas de descentralización de competencias en que está inmerso o país, de maneira que se poida dar seguimento aos plans de desenvolvemento local en materia de saúde a través dos espazos de participación cidadá deseñados; os/as integrantes destes espazos serán formados en temáticas relacionadas con prácticas de bo goberno, rendición de contas, transparencia e diálogo, e serán acompañadas no seu desempeño durante o 2017. Ademais, para reforzar o traballo en rede das OSC, elaborarase un plan de formación específico para a Rede polo Dereito á Saúde e levarán a cabo unha campaña de sensibilización que alente á poboación para participar dos espazos de escoita que existen, aínda que moi debilitados, en Kwanza Norte.