INTERVENCIÓN DE POST-EMERXENCIA NA SECCIÓN COMUNAL DE BAINET, DEPARTAMENTO DO SURESTE DE HAITÍ

O forte terremoto producido o día 12 de xaneiro de 2010, de 7,3 graos na escala Richter que sacudiu Haití, deixou miles de mortos e incontables danos materiais. O terremoto durou máis dun minuto e ou seu epicentro foi localizado a só dez quilómetros de profundidade e a 15 quilómetros ao oeste da capital haitiana, Porto Príncipe. O día 20 de xaneiro, produciuse un novo terremoto de 6,1 graos segundo a escala Richter, que derrubou edificios que quedaban aínda en pé tras o terremoto do día 12 de xaneiro e causando máis mortes.
Dada a situación e ante esta urxencia, nunha primeira fase requírese actuar en todos os sectores de primeira urxencia, e, fundamentalmente, necesítase material para auga e saneamento, equipos de acubillo (tendas de campaña, mantas e lonas), material hixiénico, medicamentos e material de desentullo. Solidariedade Internacional está a traballar, xunto a outras institucións, para poñer en marcha accións para paliar os efectos da catástrofe e destinar os fondos á provisión de alimentos, medicamentos, mantas, tendas de campaña, equipos de hixiene, equipos de limpeza de entullos e aparellos para o fogar.