MELLORA DA CALIDADE EDUCATIVA CON PERTINENCIA CULTURAL E DE XÉNERO DA FORMACIÓN DO NENEZ E XUVENTUDE DO MUNICIPIO DE CHAMPERICO, RETALHULEU

Esta intervención enmárcase no Programa de Desenvolvemento Integral Oxlajuj Tz’ikin, financiado e executado pola Xunta de Galicia, 5 ONG galegas e 9 ONG guatemaltecas, en colaboración co Consello Microregional de Champerico. Pretende mellorar a calidade educativa con pertinencia cultural e de xénero da formación da nenez e xuventude do Municipio de Champerico, Retalhuleu mediante a creación de condicións axeitadas para que os/as alumnos/as poidan desempeñar da mellor forma posible o seu traballo escolar.
Para iso prevese a construción do Instituto Nacional de Educación Básica (INEB) de Nueva Cajolá, onde se proporcionará unha educación de calidade con pertinencia cultural e de xénero para o exercicio da cidadanía e a xeración dun pensamento crítico nas mozas e nos mozos. Así mesmo, procurarase elevar a calidade dos servizos de educación en forma integral, atendendo a criterios de pertinencia sociocultural, efectividade pedagóxica e equidade de xénero.
Dende o punto de vista educativo, a intervención levada a cabo por Educación Sen Fronteiras e PRODESSA terá polo tanto dous eixos de intervención:

1. A consolidación da organización do centro educativo para o desenvolvemento pleno do currículo do nivel básico con calidade, pertinencia cultural e enfoque de xénero.

2. A dotación de equipos, materiais e insumos de calidade ao centro educativo para o seu funcionamento efectivo, de acordo ás necesidades específicas do ciclo formativo con criterios de pertinencia e sostibilidade.

En canto á parte de construción da infraestrutura para o INEB, Arquitectos Sen Fronteiras e Asiaprodi encargaranse de deseñar, edificar e equipar un edificio axeitado ás necesidades específicas do ciclo de básico e que cumpra criterios de viabilidade e sustentabilidade no ámbito.

Período de execución: outubro 2010 – outubro 2011