Mellora das condicións de acceso a un hábitat domiciliar saudable da poboación máis vulnerable do departamento de Retalhuleu, Guatemala, con énfase nas mulleres viúvas ou solteiras. Fase 6 (peche)

O presente proxecto constitúe a fase sexta e de peche do Programa de hábitat domiciliar Ban Chuinklal, desenvolto desde o ano 2014 ata a actualidade (6 anos) polas organizacións  consorciadas no proxecto: Arquitectura Sen Fronteiras, ASIAPRODI e FODHAP; e que, á súa vez, deu continuidade á liña de habitabilidade básica do Programa de Desenvolvemento Integral (IDI) Oxlajuj Tz´ ikin, promovido pola Cooperación Galega nos municipios de Champerico e Retalhuleu entre os anos 2008 e 2012.

Trátase dun proxecto de peche dentro do programa Ban Chuinklal. Este peche non está provocado pola superación dos déficits educativos na rexión, senón que se considera necesario dar apertura a un espazo de reflexión e de redeseño da estratexia de traballo no departamento. Por unha banda, despois de seis anos de intervención, o proxecto logrou e promoveu cambios positivos nas comunidades; por outro, o contexto xeral  centroamericano, de Guatemala, da rexión e da cooperación internacional cambiou; por todo isto faise necesario unha análise do realizado e valorar unha reorientación na estratexia de traballo. Neste sentido xa se abriu un proceso, que continuará ao longo deste ano; con titulares de dereitos, responsabilidades e obrigacións, co obxectivo de establecer un novo enfoque para a abordaxe dos déficits habitacionais de todas as comunidades cun enfoque máis amplo e que responda mellor ás condicións e demandas da poboación.

Como proxecto de peche, púxose especial atención na incorporación, nos diferentes resultados, de accións orientadas, en primeiro lugar, á transferencia de capacidades a titulares de obrigacións, responsabilidades e dereitos; e, doutra banda, á avaliación e sistematización da experiencia do programa. O obxectivo sería aproveitar as aprendizaxes para un novo reenfoque das accións ou para o traslado da experiencia a outras rexións de Guatemala.

Con respecto ao contido da intervención do presente proxecto, tratouse de recoller as aprendizaxes de etapas anteriores, froito da reflexión interna do equipo e da visión externa das avaliacións anteriores, definindo unha nova intervención en materia de hábitat domiciliar cun carácter máis integral. O proxecto estrutúrase en 4 resultados: o primeiro e o terceiro cun enfoque estratéxico, o segundo cun enfoque de emerxencia e o cuarto, relacionado co seguimento, avaliación, sistematización e difusión do proxecto.