MELLORA DAS CONDICIÓNS PARA O APROVEITAMENTO SUSTENTABLE DOS RECURSOS PESQUEIROS E ACUÍCOLAS DA ZONA DO BAIXO LEMPA

Este proxecto inscríbese nun plan de actuación dirixido ao fortalecemento do sector da pesca artesanal na zona da desembocadura do río Lempa, dende unha perspectiva sostible, axeitada e respectuosa co medio e dá continuidade a tres fases previas xa executadas.
A fase que se presenta con este proxecto é a cuarta e última, polo que se enfoca ao reforzo daqueles elementos prioritarios para garantir un enfoque de sustentabilidade a longo prazo. É fundamental un papel activo de asesoramento dos axentes galegos de cooperación con experiencia no ámbito do desenvolvemento pesqueiro en Galicia nunha experiencia similar, por isto o proxecto é un consorcio entre ACPP, USC e Agareso e cóntase coa realización dunha asistencia técnica de Cetmar.
Co obxectivo de mellorar as capacidades da sociedade cooperativa Bocanalempa (das que forman parte as cooperativas beneficiarias) implementarase un ciclo de capacitación en xestión empresarial de desenvolvemento de competencias e deseñarase un plan de fortalecemento empresarial que marque as estratexias a seguir para garantir a sustentabilidade a longo prazo. Co apoio de Profopac, continuarase co proceso de capacitación dos pescadores/as das cooperativas e reforzaranse as capacidades materiais das 8 cooperativas beneficiarias mediante a dotación de apeiros para unha pesca sostible e segura, ademais de diversificar os insumos e as actividades produtivas das súas cooperativas membros.
Transversalmente, preténdese reforzar a integralidade da perspectiva de xénero en todas as actividades que se leven a cabo, para o que se realizará un ciclo de capacitación en equidade de xénero e masculinidade.
Período de execución: setembro 2010 – xullo 2011