O tesouro de Acahualinca

O presente proxecto pertence á área de traballo de Educación para o Desenvolvemento de Solidariedade Internacional de Galicia e responde á estratexia impulsada pola organización neste ámbito a través do desenvolvemento dunha campaña educativa destinada ao nivel de secundaria dos centros educativos da nosa Comunidade Autónoma.

O obxectivo fundamental deste proxecto é a visibilización das accións de Cooperación ao Desenvolvemento que se están a realizar no barrio nicaraguano de Acahulainca, financiadas pola Xunta de Galicia dende o ano 2009. En Solidariedade Internacional consideran fundamental que a cidadanía galega acceda ao coñecemento sobre as liñas de acción e estratexias de desenvolvemento que se impulsan dende as organizacións de cooperación en lugares onde existe unha situación de pobreza extrema.

O presente proxecto xurde coa ambición de mostrar como é a vida nun país de Centroamérica. Debido á dificultade deste reto, as accións de Educación para o Desenvolvemento irán dirixidas a amosar un proxecto de cooperación moi específico, concretamente o que se está a realizar no Barrio de Acahualinca en Managua. A partir desta experiencia concreta intentarase expor o ritmo de vida da mocidade nicaraguana, reforzando a idea de que as inquedanzas da xuventude son as mesmas tanto no Norte coma no Sur, só cambia o xeito de levalas a cabo debido ao contexto que rodea a eses mozos e mozas.

Para conseguir transmitir todas estas ideas, levaranse a cabo varias accións. A primeira delas será recompilar toda a información posible sobre o propio proxecto de Cooperación ao Desenvolvemento para poder así impulsar a segunda acción, que consiste na realización de obradoiros en 15 centros educativos onde Solidariedade Internacional Galicia leva case dez anos traballando e nos que, polo tanto, existe un traballo previo en Educación para o Desenvolvemento. Trátase de facer un traballo continuado ao longo de todo o curso a través de dinámicas de presentación do proxecto, xornadas sobre experiencias da xuventude nicaraguana e da mocidade galega, a titorización da creación dun vídeo clip participativo a realizar polos mozos e mozas e a visibilización de todo o proxecto de cooperación a través dun concerto do grupo Pachama Crew.