AYMURAY MIT´A : Mellora do estado nutricional de nenos/as cun enfoque agroecolóxico, produtivo e ambiental en catro Unidades Educativas dos Municipios de Toco e Tarata, Cochabamba. Bolivia

O obxectivo do proxecto é mellorar o estado nutricional de nenas e nenos a través do acceso e a mellora da dispoñibilidade de alimentos nutritivos cun enfoque agroecolóxico, produtivo e ambiental en catro unidades educativas dos municipios de Toco e Tarata.

Para lograr este obxectivo realizaranse procesos de capacitación e sensibilización a mestres/as, pais/nais de familia e nenos/as con enfoque de educación produtiva destinada ao manexo de hortas escolares para a produción agroecolóxica de alimentos saudables e nutritivos. Neste marco, os comedores escolares xogarán un papel determinante en canto a que os coñecementos non serán só parte dun proceso de información e capacitación, senón de vivencia cotiá a través da toma de alimentos, o xantar de medio día, cunha dieta debidamente equilibrada. Así, a alimentación dos nenos e nenas nos comedores permitirá transcender o traballo académico nos centros escolares cara a incorporación de novos hábitos incidindo positivamente nos patróns de comportamento alimenticio para mellorar a saúde da poboación infantil.

Así mesmo traballarase na mellora do consumo de alimentos diversificados e de alto valor nutricional a través da dotación de racións alimentarias nutritivas a escolares de 4 a 16 anos de idade, xestionadas por pais e nais de familia e autoridades educativas e municipais; e, máis importante aínda, a través do consumo de verduras e hortalizas producidas nas hortas escolares que acheguen polo menos o 10% dos requirimentos diarios en quilocalorías da poboación escolar.

Estas unidades produtivas que se establecerán nas escolas constituiranse en verdadeiros centros de aprendizaxe posto que os procesos de capacitación tanto a nenos/as como ás súas familias desenvolveranse no marco da educación produtiva agroecolóxica nutricional, onde a teoría e a práctica van xuntas. Este enfoque do proxecto terá o seu correlato na elaboración dun instrumento didáctico para o nivel primario que basicamente será elaborado coas achegas de mestres/as, pais e nais de familia e autoridades educativas; os contidos estarán orientados á agricultura ecolóxica, a saúde integral mediante unha alimentación saudable e nutritiva, así como en temas de medio ambiente.

O proceso de traballo nas hortas escolares e na xestión dos comedores contará coa participación de toda a comunidade educativa, onde mestres/as, nenos e nenas e fundamentalmente as Xuntas Escolares de pais e nais de familia, constituiranse nos actores principais. Neste sentido, a característica da presente proposta é a participación social comunitaria e o enfoque produtivo, orientado á seguridade alimentaria e agroecolóxica.