A ED na formación dos profesionais da educación. Estudo de caso: as titulacións da Facultade de Ciencias da Educación da USC. Fase I.

O proxecto “A ED na formación dos profesionais da educación. Estudo de caso: as titulacións da Facultade de Ciencias da Educación da USC. Fase I” céntrase en coñecer o grao da inserción da EDCG na formación inicial dos/as profesionais da educación que se forman na Facultade de Ciencias da Educación da Universidade de Santiago de Compostela (USC), co obxecto de potenciar o seu desenvolvemento.

Este traballo focalízase na incidencia da formación dos perfís profesionais e persoais dos/as universitarios dende a súa formación inicial, dende as propias aulas universitarias. Os/as actuais estudantes universitarios son os profesionais do futuro e os/as cidadáns do presente. A súa perspectiva sobre o desenvolvemento, a xustiza social, as desigualdades e a pobreza perpetuará un modelo insostible ou formulará novas solucións e novos compromisos. Tan só cunha cidadanía formada e comprometida poderemos aspirar a cambios reais.

Tomamos como referencia neste traballo aos futuros profesionais da educación das titulacións:

- Grao en Educación Social;

- Grao en Pedagoxía (única titulación do Sistema Universitario de Galicia);

- Grao en Mestre de Educación Infantil;

- Grao en Mestre de Educación Primaria;

- Máster Universitario en Profesorado de Educación Secundaria Obrigatoria, Formación Profesional e Ensinanzas de Idiomas;

- Máster Universitario en Investigación en Educación, Diversidade Cultural e Desenvolvemento Comunitario

Tomamos como referencia estos/as profesionais da educación, porque a educación superior tamén é educación formal, posiblemente un dos sectores máis esquecidos da ED, e porque cada unha das receptoras e dos receptores da formación será, á súa vez, un axente multiplicador/a.