Proporcionar acceso a auga potable e segura ás poboacións máis vulnerables das rexións de Etiopía afectadas pola seca

Entre 2015 e 2016 Etiopía sufriu a peor seca en décadas, provocada polo fenómeno meteorolóxico do Neno, que afectou a máis da metade do país con 454 woredas (circunscricións administrativas) identificadas como prioritarias e 10,2 millóns de persoas en necesidade de asistencia de emerxencia durante 2016. As maiores consecuencias tivéronas as rexións de Amhara, Afar, Oromía, Somali, Nacións, Nacionalidades e Pobos do Sur e Tigré. A necesidade de axuda humanitaria foi aínda maior que en calquera emerxencia anterior, cunha estimación de 420.000 nenos e nenas con necesidade tratamento nutricional e 3,9 millóns de persoas con necesidade de acceder a servizos de emerxencia de Auga, Saneamento e Hixiene. Brotes de epidemias, especialmente de cólera, arrasaron o país con máis de 34.568 casos en 10 rexións auxiliadas desde novembro de 2015 e un total de 76 mortes.

Debido á gran resposta coordinada de doantes, colaboradores/as e o Goberno, dentro da resposta a o Neno, UNICEF conseguiu prover acceso a servizos de auga, saneamento e hixiene a un total de 3.188.065 persoas afectadas pola seca. A resposta de UNICEF incluía principalmente o transporte de auga en camións cisterna (a máis dun millón de persoas), distribución de produtos químicos domésticos para tratar a auga (a case 800 mil persoas), distribución de Estratexias Nacionais de Inclusión Financeira de Auga, Saneamento e Hixiene (743.404 persoas), sistema de emerxencia de provisión de auga con tanques de almacenamento de auga (74.288 persoas), rehabilitación dos sistemas de auga existentes (1.153.856 persoas) e, por último, a construción de novos sistemas (70.969 persoas). Así mesmo, chegouse a máis de 71.730 persoas a través de educación sobre hixiene e cursos sobre desenvolvemento de capacidades.

Pero a pesar da resposta en 2016 ao fenómeno do Neno, o impacto da seca na perda de activos e medios de vida continúa vixente e a situación está a verse agravada pola nova seca derivada do Dipolo do Océano Índico (de aquí en diante IOD polas súas siglas en inglés). O encadeamento destes dous fenómenos é a principal causa que explica a situación de emerxencia que está a vivir Etiopía nestes momentos.

Ademais, as previsións indican que a seca empeorará nos próximos meses, con baixas precipitacións durante a principal estación de choivas para as comunidades de pastores e agro pastoriles no actual cinto de seca. Isto supón ademais un aumento do risco de contaxio de enfermidades relacionadas coa falta de acceso a auga potable e a sistemas de saneamento de calidade, poñendo en risco a vida de miles de persoas, o que fai necesaria a distribución máis de subministracións básicas.