Protección mediante o acceso a educación temperá de nenas e nenos refuxiados no campamento de Dzaleka, Malawi

Malawi continúa loitando contra a pobreza xeneralizada 55 anos despois da súa independencia. A pesar da súa relativa estabilidade política, o país ten o Produto Nacional Bruto per cápita máis baixo do mundo: 250 dólares. O 90% dos seus 18 millóns de habitantes vive da agricultura de subsistencia e máis do 50% vive por baixo do limiar da pobreza. A pacífica situación política e a súa estratéxica xeo localización, fronteiriza con Zambia, Mozambique e Tanzania, fan que, a pesar das duras condicións e baixos niveis de desenvolvemento socioeconómico, Malawi acolla, a día de hoxe, aproximadamente a 40.000 refuxiados e demandantes de asilo; a maioría provenientes de áreas en conflito na rexión dos Grandes Lagos de África central, así como de Somalia e Etiopía. O campo de Dzaleka, distrito de Dowa, abriuse a mediados dos anos 90, para dar cabida a miles de familias que fuxían da escalada de violencia provocada a raíz do xenocidio ruandés. Hoxe, vinte e cinco anos despois, este campo conta cunha media de 500 novas chegadas ao mes. A maior parte destas persoas chegan da República Democrática do Congo.

Este proxecto de educación en situación de emerxencia xorde de traballo conxunto do Servizo Xesuíta a Refuxiados (JRS) e Entreculturas e busca fortalecer 9 centros da comunidade educativa de Dzaleka que ofrecen educación temperá. Por iso, o proxecto coordínase tanto coas autoridades locais como co resto de organizacións da sociedade civil e os Organismos Internacionais e parte dunha necesidade detectada no terreo, manifestada pola poboación beneficiaria e corroborada por actores relevantes como a Axencia de Nacións Unidas para os Refuxiados (ACNUR), o Ministerio de Educación, Ciencia e Tecnoloxía de Malawi e o Ministerio de Xénero, Infancia e Asuntos Sociais de Malawi. Así pois, da participación da poboación local, do acompañamento do persoal técnico e do seguimento de Entreculturas depende a garantía dun ambiente educativo protector, inclusivo e de calidade en educación temperá para as nenas e nenos refuxiados de Dzaleka.