A soberanía alimentaria en risco: sensibilizando e capacitando á sociedade para o cambio sostible

Tras anos de traballo na rexión de Centroamérica, onde as ameazas á soberanía alimentaria se presentan como unhas das principais causas de empobrecemento, Amigos da Terra busca difundir na sociedade galega o coñecemento desta realidade dende un enfoque integral, no senso de amosala a través de todos os puntos de vista. Deste xeito, e seguindo as liñas estratéxicas que definen as actuacións de Educación para o Desenvolvemento desta entidade, o proxecto vertebrarase ao longo de tres eixos: o coñecemento da problemática da soberanía alimentaria, a análise crítica da situación da mesma no sur e da nosa responsabilidade ao respecto, e a presentación e introdución da poboación na práctica de alternativas sostibles de produción agroecolóxica impulsadas nos proxectos de cooperación.

En concreto, o proxecto levarase a cabo a través de varias actuacións complementarias. En primeiro lugar, e como actividade transversal e permanente, realizarase unha difusión da problemática da soberanía alimentaria dende todos os puntos de vista (situación actual nas rexións empobrecidas, principais ameazas, alternativas e vías de solución). Será unha difusión xeral a través da web e das redes sociais, principalmente para garantir a maior difusión e achega á sociedade. Paralelamente, se divulgarán todas as actividades vinculadas co proxecto, de xeito que se poida chegar tamén a todas aquelas persoas que non participaron directamente nas mesmas e espertar o seu interese para outras accións futuras. Ademais, tamén se fará unha difusión presencial da problemática, enfocándoa desde un punto de vista práctico mediante un intercambio de experiencias Norte-Sur, que amose á sociedade os resultados das alternativas de produción sostibles impulsadas nas rexións empobrecidas, así como a viabilidade real da implantación deste sistema produtivo (agricultura ecolóxica) na nosa sociedade.

Por outra banda, esta actividade divulgativa acompañarase de varias actividades de capacitación e introdución na produción ecolóxica, para impulsar o cambio nas actuais pautas de consumo e fomentar o nacemento e a posta en marcha de posteriores iniciativas cidadás desta natureza. Deste xeito contribuirase á creación dunha sociedade informada, crítica e, sobre todo, con capacidade de cambio.