Proxectos

O obxectivo do proxecto é mellorar as condicións de acceso á saúde da poboación da área rural de quince municipios do Departamento do Quiché con énfase nas mulleres indíxenas, a través da mellora da calidade e cobertura de atención con pertinencia cultural dos servizos de saúde sexual e reprodutiva, e medicamentos esenciais. Para iso expón tres compoñentes de traballo: atención en saúde primaria, acceso a medicamentos e fortalecemento organizativo vinculado á saúde.

Este proxecto nace como resultado de 14 anos de traballo de Implicadas no Desenvolvemento a prol dunhas relacións máis xustas entre os pobos dende un compromiso feminista e crítico. No campo crucial da representación, as nosas sociedades seguen promovendo visións das comunidades do Sur que infantilizan, problematizan ou totalizan as experiencias e polo tanto mediatizan a cooperación. Esta situación vese exacerbada no caso das mulleres, que se converten en ferramentas do imaxinario para establecer ao mundo occidental como o sistema de valores modelo para todas as sociedades.

O proxecto “Proxecto de abastecemento e saneamento na comunidade de San José de las Conchas, no municipio de Marcovia en Honduras” ten a súa orixe no Programa “Redución da vulnerabilidade en áreas empobrecidas, a través do acceso á auga potable, o saneamento e a xestión sostible dos recursos hídricos e do territorio con enfoque de cunca hidrográfica en El Salvador, Honduras e Nicaragua 2008-2012”, que se está a desenvolver na zona co apoio de, entre outros, a AECID e a Xunta de Galicia.

A presente proposta pretende fortalecer as capacidades de diversos actores da sociedade galega para profundar no coñecemento e na defensa dos dereitos humanos das mulleres desde un enfoque de xénero e de dereitos. Para conseguir este obxectivo se presenta unha dobre vía de traballo. Por unha banda, traballarase a potenciación dos coñecementos e a sensibilización sobre os dereitos humanos das mulleres arredor dos eixos do dereito a unha vida libre de violencia (feminicidio e outras expresións das violencias de xénero), dereitos económicos e dereitos sexuais e reprodutivos.