Proxectos

O presente convenio tivo por obxecto establecer as condicións polas que se rexerá a colaboración entre a Consellería de Presidencia, Administracións Públicas e Xustiza e a Asociación de Solidariedade Galega co Pobo Saharauí (SOGAPS) no proxecto sanitario nos campamentos de persoas refuxiadas saharauís. O proxecto ten como obxectivo contribuír a mellorar as condicións de vida da poboación refuxiada saharauí garantindo o acceso a unha atención sanitaria de calidade.

Tanzania alberga na actualidade arredor de 300.000 persoas refuxiadas procedentes da República Democrática do Congo e de Burundi. Esta poboación, fuxida da rexión dos Grandes Lagos a mediados dos anos 90 con motivo do xenocidio desa época e dos conflitos posteriores, depende totalmente da axuda internacional ao impedirlles a lexislación de Tanzania acceder a un posto de traballo. Trátase da maior e máis complexa operación de refuxiados no continente africano, tanto pola súa duración como polo número de persoas afectadas.

As características xeográficas de Haití e o impacto da actividade humana no seu entorno teñen anulado case na súa totalidade a produtividade do país, formado nas súas tres cuartas partes por terreo montañoso, mentres que as chairas están formadas por terras deforestadas, completamente estériles hoxe en día. Neste contexto, ao redor do 80% da poboación se atopa sumida na pobreza, convertindo a este país no máis pobre de toda América Latina. Así mesmo, a porcentaxe de pobreza extrema é do 54%, o que implica que 4.450.000 habitantes viven con menos dun dólar ao día.

Médicos do Mundo leva dous anos dando resposta á situación de urxencia que vive Haití en materia de saúde na rexión de Petit-Goâve do Departamento Oeste. Lexitimada na confianza xerada entre a poboación e institucións sanitarias locais, a organización quere superar a resposta de urxencia para dotar á intervención dun carácter máis estable e planificado, acorde ao enfoque de Vinculación entre Axuda-rehabilitación e Desenvolvemento (VARD).